Cwestiynau Cyffredin ynghylch Ymgysylltu yn Ne-orllewin Cymru

Mae Trafnidiaeth Cymru ac awdurdodau lleol yn Ne-orllewin Cymru yn cydweithio i baratoi ar gyfer Diwygio Bysiau. Hwn fydd y rhanbarth cyntaf yng Nghymru lle bydd Diwygio Bysiau yn cael ei roi ar waith yn 2027.

Y cam cyntaf o ran diwygio bysiau ar gyfer y rhanbarth yw bod Trafnidiaeth Cymru ac awdurdodau lleol yn datblygu cynnig ar y cyd ar gyfer y rhwydwaith bysiau yn Ne-orllewin Cymru. Ei enw yw Rhwydwaith Sylfaen Arfaethedig - y llwybrau ac amlder y gwasanaethau y gallai bysiau eu darparu yn y rhanbarth. Ar y cynnig hwn yr hoffem gael eich adborth, ynghyd ag ar rai themâu allweddol eraill.

O gasglu mewnbwn gan y cyhoedd nawr, bydd yn ein helpu i sicrhau y bydd gennym wasanaeth cadarn ar waith yn Ne-orllewin Cymru yn 2027.

Hwn fydd y rhanbarth cyntaf yng Nghymru lle bydd Diwygio Bysiau yn cael ei gyflwyno yn 2027.

Mae'r Bil Diwygio Bysiau yn mynd drwy'r Senedd ac rydym yn anelu at gyflwyno masnachfreinio o Haf 2027. O ystyried graddfa'r newid, rydym yn bwriadu trosglwyddo i fasnachfreinio dros sawl blwyddyn rhanbarth wrth ranbarth. Dyma'r dyddiadau a'r rhanbarthau allweddol (ar hyn o bryd):

• De-orllewin Cymru - 2027
• Gogledd Cymru - 2028
• De-ddwyrain Cymru - 2029
• Canolbarth Cymru - 2030

Gallwch nodi newidiadau gan y byddant ar ffurf system rifo alffaniwmerig.  Er enghraifft, bydd y gwasanaeth 82 yn cael ei alw'n wasanaeth u82 yn ein Rhwydwaith Sylfaen Arfaethedig. Os na fydd y llwybr yn newid, bydd rhif y gwasanaeth yn parhau i fod yr un peth ag y mae heddiw.

Y Rhwydwaith Sylfaen Arfaethedig yw'r rhwydwaith y credwn y gallwn ei ddarparu o fewn terfynau ein hadnoddau presennol. Mae'n seiliedig ar y rhwydwaith presennol, er ei fod yn cynnwys rhai gwelliannau gan gynnwys:

• Rhwydwaith symlach, sy'n hawdd ei esbonio, ei gofio a'i ddefnyddio.
• Gwasanaethau aml ar lwybrau craidd fydd yn denu'r nifer uchaf o ddefnyddwyr.
• Cyfnewid rhwng gwasanaethau bysiau i alluogi teithiau cyflymach i fwy o gyrchfannau.
• Mwy o wasanaethau uniongyrchol.

Fodd bynnag, rhaid i ni fod yn onest - rydym yn gweithio o fewn terfynau ein hadnoddau (er enghraifft, argaeledd cyllid, bysiau a gyrwyr). Oherwydd hyn, fyddwn ni ddim yn gallu gwneud popeth y bydd pobl ei eisiau yn y cam cyntaf. Mae angen i ni wneud dewisiadau ynghylch sut rydym yn defnyddio'r adnoddau sydd gennym i ddarparu'r gwasanaethau gorau y gallwn o fewn ein cyfyngiadau.

Rydym wedi awgrymu rhai rhifau bysiau newydd i'w gwneud hi'n hawdd adnabod newid. Dim ond i'ch helpu chi yn ystod yr ymgysylltiad cyhoeddus y mae hyn. Nid ydym yn bwriadu newid rhifau'r bysiau yn eich ardal ar hyn o bryd.

Ry'n ni am greu rhwydwaith trafnidiaeth y mae pobl am ei ddefnyddio, yn gallu ei ddefnyddio ac sydd yn ei ddefnyddio - helpu i'w gwneud yn haws i bobl wneud dewisiadau trafnidiaeth mwy cynaliadwy nawr ac yn y dyfodol. Mae eich adborth yn bwysig er mwyn gallu gwireddu hyn.

Rydym wedi cynllunio Rhwydwaith Sylfaen Arfaethedig yn seiliedig ar y rhwydwaith presennol ynghyd â rhai Gwelliannau, ond rydym am gael eich adborth chi er mwyn gallu eu mireinio. Rydym wedi defnyddio'r wybodaeth sydd gennym am y galw sydd am deithio, dibynadwyedd gwasanaethau bysiau ac amodau gweithredu i gefnogi'r datblygiad hwn ond mae adborth y cyhoedd hefyd yn hanfodol, ac rydym bellach wrthi yn ei gasglu.

Os oes gennych farn ar lwybrau bysiau ac amlder neu farn am yr hyn y dylem ei flaenoriaethu o ran dylunio'r rhwydwaith bysiau yn eich ardal - dyma'r amser i ddweud eich dweud.

Rydym am greu mwy o gyfleoedd i bobl ddefnyddio trafnidiaeth gyhoeddus, fel ei fod yn fwy defnyddiol i fwy o bobl mewn mwy o sefyllfaoedd. Dyna pam ei bod yn bwysig ein bod yn cael adborth defnyddwyr a phobl nad ydynt yn ddefnyddwyr fel ei gilydd i helpu i fireinio ein cynigion. Fel hyn, gallwn sicrhau ein bod yn dylunio gwasanaethau bysiau sy'n hygyrch i gynifer o bobl â phosibl.

Mae gwasanaethau bysiau ar gyfer pawb, nid dim ond y bobl sy'n eu defnyddio nawr. Rydym yn awyddus i gynnwys pawb sydd â diddordeb yn nyfodol gwasanaethau bysiau ar gyfer y rhanbarth. Rydym am glywed amrywiaeth o safbwyntiau – gan y rhai sy'n dibynnu'n helaeth ar wasanaethau bysiau ar hyn o bryd yn ogystal â'r rhai sy'n eu defnyddio o bryd i'w gilydd neu byth.

Felly, rydym yn annog pawb i gymryd rhan yn yr ymgysylltiad hwn. Rydym wedi sicrhau bod ein platfform ymgysylltu 'dweud eich dweud' mor hawdd â phosibl i'w ddefnyddio. Rydym hefyd yn cynnal digwyddiadau wyneb yn wyneb lle gallwn gasglu adborth yn fyw yn ogystal â helpu pobl i lenwi'r arolwg dros y ffôn os oes angen.

Rydym yn hyrwyddo'r platfform ymgysylltu ar draws y rhanbarth, trwy'r cyfryngau ac ar y cyfryngau cymdeithasol, mewn hysbysebion lleol yng nghanol trefi a siopau a thrwy sefydliadau partner fel cyfryngau cymdeithasol awdurdodau lleol. Mae hyn er mwyn hyrwyddo’r cyfle i gymryd rhan ymhell ac agos.

Rydym hefyd yn hyrwyddo'r cyfle trwy rwydweithiau sy'n cynrychioli nodweddion gwarchodedig i sicrhau ein bod yn clywed gan amrywiaeth eang o leisiau, gan gynnwys rhwydweithiau myfyrwyr, pobl hŷn a grwpiau anodd eu cyrraedd a phanel mynediad a chynhwysiant TrC.

Bydd eich adborth yn ein helpu i fireinio ein cynigion a bydd casglu barn y cyhoedd nawr yn helpu i sicrhau bod gennym wasanaeth cadarn ar waith yn Ne-orllewin Cymru yn 2027.

Byddwn yn ystyried yr adborth wrth i ni weithio mewn partneriaeth ag awdurdodau lleol yn Ne-orllewin Cymru i ddiweddaru'r Rhwydwaith Sylfaen Arfaethedig yn hydref 2025.

Byddwn yn sicrhau y bydd y Rhwydwaith Sylfaen Ddiweddaraf ar gael yn gyhoeddus erbyn diwedd 2025.

Rydym yn eich annog i geisio cwblhau'r arolwg ar-lein yn y lle cyntaf, gan fod hwn yn cynnwys yr wybodaeth a'r mapiau manwl i helpu i roi'r adborth penodol sydd ei angen arnom fel y gallwn fireinio'r rhwydwaith sylfaen arfaethedig.

Fodd bynnag, os nad yw hyn yn bosibl gallwch naill ai ddod i un o'n digwyddiadau galw heibio cyhoeddus neu gysylltu â ni. Gallwn eich helpu i lenwi'r arolwg yn y digwyddiadau hyn neu dros y ffôn.

Edrychwch ar ein tudalennau cwestiynau cyffredin. Mae'n ddigon posibl y bydd yr ateb sydd ei angen arnoch ar gael yno.

Rydym hefyd yn eich annog i fynychu un o'n digwyddiadau galw heibio cyhoeddus. Bydd aelodau o dimau TrC ac Awdurdodau Lleol wrth law i sgwrsio â chi am y Rhwydwaith Sylfaen Arfaethedig ac i ateb unrhyw gwestiynau. Ry'n ni'n gobeithio y gallant eich helpu i gymryd rhan yn yr arolwg ar-lein, naill ai yn y digwyddiad, neu yn eich amser eich hun.

Os na allwch ddod o hyd i'r ateb yn ein tudalennau cwestiynau cyffredin neu os nad ydych yn bwriadu dod i ddigwyddiad cyhoeddus, gallwch anfon e-bost aton ni: trc.cymru/cysylltu-a-ni

Yr unig ffordd y gellir cofnodi ymatebion yn ffurfiol yw os cânt eu derbyn ar ffurf yr arolwg. Ni allwn dderbyn neges e-bost fel ymateb i'r arolwg, ond gallwn eich helpu i lenwi'r arolwg os oes angen.

Noder, ni allwn ateb cwestiynau am eich gwasanaeth bws presennol. Cysylltwch â'ch gweithredwr bysiau lleol os oes gennych gwestiynau.

Gallwch ddod o hyd i ffyrdd o gysylltu â ni yma.

Rydym wedi trefnu cyfres o ddigwyddiadau galw heibio ar draws rhanbarth De-orllewin Cymru, mewn trefi ar draws y pedwar awdurdod lleol. Mae gennym dîm bach a phrysur felly er y byddem, mewn byd delfrydol, yn hoffi cynnal llawer mwy o sesiynau galw heibio, mae angen i ni sicrhau ein bod yn cydbwyso ein hadnoddau'n rhesymol.

Rydym wedi ystyried hygyrchedd lleoliadau, poblogaeth a pha mor agos ydynt at gysylltiadau trafnidiaeth lleol wrth wneud y trefniadau. Rydym yn deall y bydd rhai pobl am gwrdd â ni ond yn cael anhawster i ddod i un o'n digwyddiadau. Ry'n ni'n ymddiheuro os digwydd hyn er ein bod wedi sicrhau bod y wybodaeth ar-lein yn ddigonol a bod yr arolwg yn hawdd ei gwblhau.

Byddwn yn hyrwyddo'r ymgysylltiad trwy lawer o ddulliau eraill gan gynnwys trwy sianeli partner, dosbarthu cardiau busnes gyda chysylltiadau uniongyrchol i’r arolwg, posteri ar fysiau, ymysg grwpiau ffocws a chynllun hysbysebu ar-lein ac y tu allan i'r cartref. Ry'n ni'n awyddus i ledaenu'r neges mor bell ac agos â phosibl. Gallwch hefyd gysylltu â ni yn trc.cymru/cysylltu-a-ni os oes angen cymorth arnoch i lenwi'r arolwg.

Mae gennych tan 23 Medi i gwblhau'r arolwg.

Caiff y data a gesglir o'r ymgysylltiad hwn ei ddadansoddi, ei werthuso, ei grynhoi a'i gyhoeddi ar ffurf adroddiad.

Byddwn yn gweithio mewn partneriaeth ag awdurdodau lleol yn Ne-orllewin Cymru i ddiweddaru'r Rhwydwaith Sylfaen Arfaethedig yn hydref 2025.

Byddwn yn sicrhau bod y Rhwydwaith Sylfaen Ddiweddaraf ar gael i'r cyhoedd erbyn diwedd 2025. Yna, y gobaith yw ei roi ar waith ar ffurf masnachfreinio yn 2027.